மெடிக்கல் சீட்

மெடிக்கலுக்காக முட்டி மோதி படித்து கடைசியில் உதடு பிதுங்கி இஞ்சினியரிங்கில் சேர்ந்து ஒரு மாதம் மெடிக்கல் கிடைக்காத துக்கத்தை அழுது ஒழித்து கழிந்த பிறகு, ஓர் இரவு. அதே டேபிள். அதே டிவி. அதே சேனல். அதே காட்சி. கே டிவியில் ‘மௌன ராகம்’ சூப்பர் ஹிட் இரவுக்காட்சி ஓடிக்கொண்டிருந்தது. அம்மாவும் நானும் பார்த்துக்கொண்டிருந்தோம்.

ரேவதி படியில் மேலேறும்போது மோகன் பின்னடியே ஓடிச்சென்று கையை பிடிப்பார்.

‘கைய பிடிக்காதீங்க. ‘ரேவதியின் டயலாக்.

மோகன், ‘ஏன்?’

‘கைய பிடிக்காதீங்கனா பிடிக்காதீங்க.’ மறுபடியும் ரேவதி.

‘அதான் ஏன்?’, மீண்டும் மோகன்.

அதற்கு ரேவதி பதில் சொல்லும் முன்பு, நான் முந்திக்கொண்டேன்.

‘நீங்க தொட்டா கம்பளிப்பூச்சி ஊறுர மாதிரி இருக்குது.’

பக்கத்தில் படம் பார்த்துக்கொண்டிருந்த என் அம்மா, ‘மெடிக்கல் சீட் உனக்கு ஏன் கிடைக்கலனு இப்பதான் புரியுது.’